Við upphaf starfstíma þurfa öll þau sem hefja störf hjá Reykjanesbæ að skila ýmsum gögnum til launa­- og kjaradeildar. Öll störf eru launasett samkvæmt starfsmati  en finna má upplýsingar um það á vefsíðunni þeirra. Þau gögn sem skila þarf eru bæði til þess fallin að raða starfsmanni í ákveðna launaflokka skv. starfsmati en einnig til þess að meta persónubundna þætti. Persónubundnir þættir miðast af því námi sem viðkomandi hefur lokið og þeirri starfsreynslu sem viðkomandi hefur aflað sér við fyrri störf. Reykjanesbær hefur öðlast jafnlaunavottun og eru allar launaákvarðanir í samræmi við jafnlaunastaðalinn ÍST85.

Það sama gild­ir um nú­ver­andi starfs­fólk. hafi það áunn­ið sér rík­ari rétt varðandi launakjör, svo sem bætt við sig viðbótarmenntun á starfstímanum.

Öll­um gögn­um þarf að skila for­stöðu­manni stofnunar/starfseiningar, sem kem­ur þeim til launa­- og kjaradeild­ar.

Gögn sem þarf að skila inn

Til þess að hægt sé að launasetja starfsfólk þarf áður en ráðningarsamningur er gerður að skila eftirfarandi gögnum:

• Öll menntunargögn sem viðkomandi hefur undir höndum varðandi lokið nám. Það er brautskráningarskírteini, námsferilsyfirlit og leyfisbréf ef við á. Auk þess geta þeir sem hafa ekki stúdentspróf skilað inn yfirliti yfir lokin námskeið og fengið þau metin til launa. Námskeiðin þurfa samanlagt að telja a.m.k. 150 kennslustundir.
• Starfsvottorð frá fyrrum vinnuveitendum. Reykjanesbær metur starfstíma hjá ríki og bæ að fullu skv. kjarasamningum en einnig er hægt að skila starfsvottorði frá einkaaðilum hafi viðkomandi sinnt sambærilegu starfi og þá fengið þann starfstíma metinn til launa hjá Reykjanesbæ. Einungis starfsaldur frá ríki eða bæ telur til veikindaréttar.
• Afrit af samningi um viðbótarlífeyrissparnað. Ætli umsækjandi að sækja mótframlag atvinnurekanda í viðbótarlífeyrissparnað þarf að skila afriti af samningnum til launa- og kjaradeildar.
• Nýting persónuafsláttar. Nýting persónuafsláttar er tiltekin í ráðningarsamningi en ætli einstaklingur að nýta uppsafnaðan persónuafslátt er nauðsynlegt að senda „yfirlit til launagreiðanda“ af skattur.is.

Fylgdu þessum leiðbeiningum:

• 1. Farðu inn á skattur.is
• 2. Veldu "Þjónustuvefur" og skráðu þig inn með rafrænum hætti, rafrænu skilríki eða íslykli.
• 3. Veldu "Mín þjónustusíða".
• 4. Undir "Almennt" er að finna "Staðgreiðsluskrá RSK".
• 5. Þar skaltu velja "yfirlit til launagreiðanda".
• 6. Til hægri á síðunni er að finna "sækja pdf".
• 7. Sendu þetta skjal á netfangið laun@rnb.is  ásamt nafni, kennitölu og taktu fram starfsstöð þína.

Stéttarfélög og styrktarsjóðir

Stéttarfélögin hafa öll góðar vefsíður þar sem finna má upplýsingar um þá sjóði sem hægt er að sækja styrki í en þeir eru fjölmargir. Til dæmis má sækja styrk vegna náms, námskeiða, lækniskostnaðar, líkamsræktar, gleraugna og fleiru.

Reykjanesbær hvetur starfsfólk til þess að kynna sér sín stéttarfélög og hvaða sjóðir eiga við um hvert félag.