Pólsk menningarhátíð í Reykjanesbæ er nú haldin í þriðja sinn dagana 2. - 8. nóvember. Um fimmtungur allra íbúa Reykjanesbæjar er af pólskum uppruna og þykir því vel við hæfi að fagna þeim fjölbreytileika sem felst í mannlífi Reykjanesbæjar með því að fá innsýn í pólska menningu með skemmtilegum hætti.

Pólsk menningarhátíð er viðburður sem gleður augu, eyru og maga. Ávallt hefur verið lögð rík áhersla á sjónlist, tónlist og matarupplifun. Sú áhersla heldur sér þó hátíðin sé með breyttu sniði í ár, eins og annað. Hún teygir sig yfir heila viku og verða allir viðburðir hátíðarinnar aðgengilegir á samfélagsmiðlum sveitarfélagsins og vefsíðu viðburðarins.

Saman í krafti fjölbreytileikans er yfirskrift hátíðarinnar í ár enda sjaldan mikilvægara að standa saman.

Íbúar eru hvattir til þess að ganga um sveitarfélagið og njóta útiverunnar um leið og þeir skoða listsýningar sem verða í verslunargluggum á Hafnargötunni og sérstakt veggjalistarverk verður sett á vegginn aftan við gömlu sundhöllina.

Á föstudagskvöldið verður hægt er að skella sér í bílabíó og njóta pólskrar kvikmyndamenningar. Við fáum öll tækifæri til þess að læra að elda framandi mat og sérstök barnadagskrá verður á Facebook síðu Bókasafnsins.

Reykjanesbær hvetur alla til þess að leggja sig fram um að láta sig aðra varða og gefa meðborgurum sínum tækifæri til þess að vera hluti af samfélagsheildinni okkar. Sýnum hlýlegt viðmót og alúð, ræktum jákvæð tengsl við þá sem standa okkur nærri og stuðlum þannig að hamingju okkar og vellíðan sem og annarra.

Pólsk menningarhátíð veitir fullkomið tækifæri til þess að draga andann djúpt, slaka á og njóta útveru. Gleðja augu, eyru og maga og njóta sín með öllum skilningarvitunum!

Verum saman, verum samstíga, einblínum á það sem við eigum öll sameiginlegt og stuðlum að vellíðan og gleði.