Út er komin fjórða bókin í Sögu Keflavíkur.

Fyrsta bókin fjallar um Keflavík frá 1766-1890, önnur bóki um árin 1890-1920 og þriðjabókin frá 1920-1949, en það er árið sem Keflavík fékk kaupstaðaréttindi. Bjarni Guðmarsson er höfundur þessara bóka.

Fjórða bókin í sögu Keflavíkur frá 1949-1994 sem rituð er af Árna Daníel Júlíussyni, fjallar um þróun meðalstórs kaupstaðar við Faxaflóa í fullmótaðan nútímalegan bæ.

Saga Keflavíkur á árunum 1949 til 1994 er ólík sögu allra annarra sveitarfélaga á Íslandi á sama tímabili. Þar hefur koma varnarliðsins árið 1951 grundvallarþýðingu. Nálægð bæjarins við herstöðina og margvísleg samskipti við bandaríska herinn settu mark sitt á þróun atvinnulífs og menningar í Keflavík. Uppbygging herstöðvarinnar og síðar stækkun alþjóðaflugvallarins á Miðnesheiði sköpuðu mikla atvinnu og átti sinn þátt í því að sjávarútvegur lagðist nánast af við lok tímabilsins í bænum.

En lífið í Keflavík snerist þó ekki aðeins um her, flugvöll og brauðstrit. Í bænum blómstraði menningin þar sem tónlist skipaði stóran sess, enda Keflavík oft verið nefnd Bítlabærinn. Í þessu fjórða bindi af sögu Keflavíkur er fjallað um tímabilið frá því að bærinn varð sjálfstætt bæjarfélag þar til hann sameinaðist Njarðvík og Höfnum og úr varð sveitarfélagið Reykjanesbær árið 1994.

Árni Daníel Júlíusson sagnfræðingur er höfundur bókarinnar og er textinn er aðgengilegur og grípandi en hana prýðir að auki fjöldi ljósmynda sem bregða lifandi ljósi á liðna tíð og auka enn á gildi verksins.

Útgáfuhóf

Útgáfu bókarinnar verður fagnað með hófi í Bíósal Duushús miðvikudaginn 8. júní kl 18:30 þar gefst gestum færi á að kaupa bókina og mun rithöfundur árita bókina.