Á þriðja heila starfsári Keilis, miðstöðvar vísinda fræða og atvinnulífs, sem staðsett er að Ásbrú í Reykjanesbæ, hefur tekist að ná rekstrinum í jafnvægi, útskrifa 720 nemendur og þar af skapa yfir 400 nemendum ný tækifæri til að hefja háskólanám með tilkomu háskólabrúar. Meirihluti þeirra kemur frá Suðurnesjum og nær 90% þeirra stunda nú háskólanám.

Á aðalfundi Keilis s.l. föstudag rifjaði Árni Sigfússon stjórnarformaður Keilis upp aðdraganda stofnunar. Í maí 2007 sameinuðust 19 fyrirtæki og félagasamtök um að breyta herstöð í háskólasamfélag - Keilir, miðstöð vísinda fræða og atvinnulífs, var stofnaður. Lagðar voru fram á 4. hundrað milljónir í stofnfé og lagt af stað með byggingu brúar á milli nýrra atvinnutækifæra og menntunar á Suðurnesjum. Þetta var í samræmi við þá stefnu sem bæjaryfirvöld í Reykjanesbæ höfðu markað við brotthvarf hersins í október árið áður og fengið þáverandi ríkisstjórn til að styðja.

Í máli Hjálmars Árnasonar, framkvæmdastjóra Keilis, á aðalfundinum kom fram að á þriðja heila starfsári Keilis hefur tekist að ná rekstrinum í jafnvægi, útskrifa 720 nemendur og þar af skapa yfir 400 nemendum ný tækifæri til að hefja háskólanám með tilkomu háskólabrúar. Meirihluti þeirra kemur frá Suðurnesjum og nær 90% þeirra stunda nú háskólanám. 
Þetta hefði ekki tekist án stuðnings stofnendanna því ríkið hefur hingað til lagt mun minna til reksturs skólans en til sambærilegra skóla t.d. á höfuðborgarsvæðinu. Þannig gekk á framlag stofnenda á fyrstu árum Keilis. Enn er vonast eftir að ríkið skapi Keili sömu rekstrarforsendur m.a. um háskólabrú og skólum á höfuðborgarsvæðinu eru búnar. Þess er enn vænst að það komi nú fram í fjáraukalögum ríkisstjórnarinnar. Á aðalfundinum var rifjað upp að í yfirlýsingu ríkistjórnarinnar um borð í víkingaskipinu Íslendingi þann 9. nóvember í fyrra var því heitið að rekstrargrundvöllur menntastofnana á Suðurnesjum yrði tryggður og talið mikilvægt að styðja og þróa nýtt og fjölbreyttara námsframboð.